Nabil_87658 sur Sekritoo — Questions ❓

Questions ❓

مانيش مستانس نكتب كلام يقراه غيري خاتر ديما نختار نكتب لروحي أما حسيت إني لازم نشارك وجيعتي في بلاصة أخرى و لحقيقة ماكنتش نستخايل أنو السيت هذا مازال موجود و بحكم لقيت بلاصة قررت نكتب و حتى كان طولت مايهمنيش في اللخر مانيش طالب شكون باش يعاوني أما حبيت نشارك كلامي خاتر نعرف إلي العينة كان من ربي سبحانو العالم بحالي و بحال كل مهموم .. الدنيا هذي ولت صعيبة على العباد و ماشية و تصعب و لعباد بلحق تاعبة ياسر و كإنو قاعدين كلنا نعديو في ربطية و نستناو في الفرج و هو صحيح هي ربطية و لكلنا مصيرنا باش نخرجو أما فما لي يخرج و يلقى حبابو يستناو فيه و يلقى الحرية و حياة مزيانة و فما شكون يلقى روحو وحدو و الضيق و الهم يستنى فيه و أنا من العباد إلي مستعد نصبر و نتحمل المهم كي نخرج نلقى حياة مزيانة تستنى فيا و هذا المبدئ لي نعيش بيه و نتمنى نموت عليه خاتر المبدئ هذا هو لي خلاني نواصل حياتي و نتجاوز برشا فترات كانت تنجم تقضي عليا أو تخليني نوفا حياتي بقرار مني .. أما الخوف من النهار لي ناقف فيه قدام ربي هو لي يخليني نتراجع و الحمد الله إني عايش بإيمان فقلبي حتى لو كان ضعيف أما يوقفني عند حدي في برشا حاجات خاتر لو كان جاء الإيمان هاكا مافماش راني تعبت أكثر و راني فصلت الفيشة من سنين ... الدنيا هذي مزيانة لو كان أحنى عرفنا كيفاش نعيشوها أما أحنا قاعدين نعيشوا كإنوا مازلنا مطولين فيها و لي هيا حاجة متأكد إنها غالطة خاتر الكلنا نقولوها إلي الدنيا في آخرها و بلعكس ولينا متشوقين للنهاية كيفاش باش تكون و أنا مانتمناش نخلط على النهاية خاتر مانتحملش إلي باش يصير و موش خاتر نعرف شباش يصير أما خاتر نعرف صعوبية لباش يصير و يمكن حكيت ياسر أمور دين أما بالنسبة ليلي الحاجة الوحيدة في الدنيا هذي لأحنا بعاد عليها هي لباش تكون سبب في نجاتنا و ألا عذابنا و الحاجة هذي مابديت نخمم فيها كان كي عشت في الظلام وحدي سنين و لا حد سمعني و لا حد فهمني و لا حد رمالي حبل باش يخرجني من أكا الظلام تي يمكن مافم حد كان يعرف إني عايش في قعر الظلام .. هوني فهمت إلي مافم حد باش يعاوني و وقتها باش فهمت إنو ماينجم يعاوني كان لخلقني و فعلا قد مانبعد ديما نحاول نرجع و ديما نحاول نقرب لربي سبحانو أكثر خاتر في اللخر حياتنا هاكا فاش تتلخص .. يا نقربو و نفرحو يا نبعدو و نحزنو .. و كا إنسان عاش برشا وجيعة مانيش مستعد إني نعيشها

Posté par Nabil_87658 le 2023-05-24