Jihene_18795 sur Sekritoo — Thé ☕

Thé ☕

سبحان الله ربي في الدنيا يعطينا حاجات و ياخذ منا حاجات أخرى. ربي عطاني ام مثالية و صبورة و احنا محترمين كلنا و بمراكزنا و خذا منا صورة الاب اللي يلزمها تكون. هذا ابتلاء اللهم لا اعتراض. حبيت نقولكم مرسي على ميساجاتكم خليتها على ربي. انا تمنيت انه نكون فخورة ببابا خاطر المرا موش كيما الراجل. المرا اذا غاب عليها اهم سند هو البو تستوحش حتى لو هي تخدم و مستقلة ماديا ديما تحس في حاة ناقصة و تخاف من الدنيا والزمان. تمنيت نكون فخورة ببابا اما هو ربي يهديه يحب روحو اكثر من اولادو و يحب الفلوس اكثر من روحو و ملذات الحياة اللي موش عارف انه لنا باش يجي نهار و نتحاسبو قدام ربي. باش نتحاسبو على لساناتنا كي نخرجو كلمة خايبة ولا نوجعوا انسان فما بالك بالفساد والظلم و الكره رغم انه احنا كلنا قايمين بواجباتنا و محترمين و بمراكزنا ماطلبنا منو شيء طلبنا انه يحبنا يحب أولاده و يكون اب صالح نفتخروا بيه وكهو. انا نكتب هنا و نعبر على وجيعتي التطبيق هذا اعتبرتو صندوق أسراري خاطر نجم نعبر على أعمق نقطة في قلبي اللي مايعرفها عليا حد ماغير مانوري الهوية متاعي. يعطيكم الصحة اللي بعثلي ميساجات و نصحتوني حتى بدعوة خير. ربي يخليلكم العزاز عليكم ولا يوريكم غيار.

Posté par Jihene_18795 le 2023-07-24