Hela_88953 sur Sekritoo — Questions ❓

Questions ❓

بش نحكي حكايتي مالاول، باهي انا كي كان عمري 17 تعرفت على شخص و حبينا بعضنا بقينا عام مع بعضنا بعد جا خطبني خاطر حبينا يكون كل شي قدام العايلة ، قعدنا تقريب عام مخطوبين و انا في العام هاكا نقرا باك ، كان كل شي ماشي محلاه و انا كنت فرحانة برغم ضغط الباك، لكن في ليلة كل شي تقلب، صارت حاجة الي مكنتش نتوقعها و الا نعمللها حساب ، في الليلة هاكي انا ساهرة نريفز و جانا تليفون للدار قالولنا الي خويا توفى (كان عمرو 25 سنة و كان يخدم بعيد علينا و صارت مشكلة مع شخص... الشخص هذا غدر خويا و قتلو 💔 ) مغير ما ندخل في تفاصيل انا دخلت في حالة اكتئاب و صدمة، و الادهى و الأمر اني كنت نحاول نخبي على دارنا بش انجم ناقف مع امي و اخوتي، كنت نحاول نبان قوية اما انا من داخل ميتة... قد ما حاولت نخبي و شي تعداو شهرين و خطيبي قصها معايا، منجمش يتحملني كيفاه وليت، ملي كنت نضحك و نفدلك وليت بصيف الي نحكي و ديما على اعصابي ( ميعرفش الي انا معادش انجم نرقد و حتى كي نرقد يجيوني des crises de panique) كثرت بيناتنا المشاكل و قررنا الي كل حد لازم يمشي في طريقو، حاولت نكمل حياتي و نعدي الباك اما للأسف منجحتش، عاودت العام الي بعدو و خذيتو بعدها كملت قرايتي و حياتي عادي حتى لتو مازلت نكمل في الماجستير، اما الحكاية الي عشتها قبل مزالت مأثرة عليا، سكرت على روحي و معادش عندي أصحاب و منجمتش نتعرف على ناس جدد، تعداو السنين هاذم الكل و منجمتش نرجع نحكي و نفدلك عادي، ساعات نقول الي انا مزلت عايشة حالة الصدمة من موت خويا و من الي صار مع ex و ساعات نقول لا حكاية و تعدات، مش عارفة كيفاه نتصرف حاسة الي سنين قاعدة تتعدى و انا واقفة في نفس البلاصة و مش منجمة نقدم 💔

Posté par Hela_88953 le 2023-08-25