Marwen_89109 sur Sekritoo — Questions ❓

Questions ❓

عسلامة الناس الكل
انا الي هبطت المرة الي فاتت اني بش نحرق على طريق تركيا اليونان
فعلا مشينا من تركيا للحدود اليونانية.نهار الاحد الي فات في الليل ، و ما نحكيلكمش على كيفاش كل واحد فينا حضر روحه و قداش كل واحد فينا علق امال على المشية هذه ، وصلنا لنقطة التحميل ، استنينا ناس اخرين بش تجي و بعد جاء الحراق الي بش يعدينا ، تجمعنا و بعد مشينا مسافة و وقفنا حرس للحدود التركي خرجنا دبشنا الكل في القاعة و فركتونا ، انا كان عندي سكينة لوحتها ، بعد صورونا و لمينا دبشنا و مشينا ، قعدنا نمشيو في المستنقعات و في الطباعي و في الظلام حتى وصلنا لنهر ايفروس منين بش نتعداو ، نفخنا البلم و ركبنا و قطعنا الواد و بعد وصلنا لليونان جرينا و عثرت انا و طحت و ضاعو عليا الي مشاو معاي
قعدت نمشي مرة و نجري مرة و نرتاح مرة في الاراضي و في اخر كل ارض فمة مستنقع لازم تطيح فيه و تتعداه و تتعدى الارض الي بعده الخ الخ لين قعدت و ارتحت بعد ما قريب نموت من التعب و من الثقل متاع الساك و الحوايج ، بعد لقيت piste بين الاراضي قعدت نمشي فيها ، وصلت بعدها لسكة متاع train مشيته فيها شوية و شفت من بعيد فيلاج مشيتله انا وصلتله و جات الشرطة اليونانية ، سلمت روحي و حطوني في صندوق السيارة و هزوني للحبس و نحاولي السبتة و الصباط و الكلاسط و gilet كنت لابسها و دخلوني للحبس
الحبس هذاكة ملاجئ الحيوانات خير منه ، ناس حاشاكم تقضي حاجتها في تركينة لا فمة لا ماء لا ماكلة لا شيء ( بإستثناء درجين و لا ربع ساعة ماء من الكوتشو )
معاملة العسكر اليوناني كانت معاملة قمة في الحقارة و في للعنصرية و في اللاإنسانية ما كنتش نتوقع الي فمة ناس عنصريين للدرجة ، ضرب و سبان و اهانات و ناس يعريوهم قدام النساء حتى الاولاد الصغار يضربوهم
المهم ، بعد فترة اختارو عشرين واحد و سيبوهم و ركبوهم في شاحنة مغلقة ( تصورو انتم انسان مريض بضيق النفس ينجم يموت )
بعد اختارو عشرين اخرين و ركبوهم في كميونة اخرى كنت انا من ضمنها و هزونا مشات بينما الشاحنة مدة و هي صغيرة و الهواء بالسيف يتعدى فيها و فيها عشرين شخص للدرجة انه زوز داخوا
قعدت الشاحنة تمشي لمدة ساعة غير ربع تقريبا و ساعات توقف و يحلولنا الباب للتهوئة حتى لين وصلنا للحدود و سلمونا للمرتزقة الي معاملتهم ما كانتش احسن من معاملة العسكر اليوناني ركبونا في البلم و مشاو بينا لنص الواد و بعد رماو

Posté par Marwen_89109 le 2023-09-02