Hamza_42366 sur Sekritoo — Thé ☕

Thé ☕

ليلة مانسيتهاش، المكان شطّ سيدي عليّ المكيّ، الزّمان 2 بعد نصّ اللّيل متخبيّن في الجبل و عينينا على البحر نستنّو و قتاش الشقّف يقرب للحجر باش نهبطو في اسرع وقت نركبو في رحلة يعلم بيها كان ربيّ تنجح والا تفشل... كل حد سارح في خيالو و قلبو يضرب، النفّس بشْويّا و الكلام ممنوع كان بالهمس، و أحنا اكاكا شفنا الشّقف قرب بلاش ضوء، كان ضوء القمر، ليلة هادئة برشا و الماء كيف الزيّت، بدينا هابطين من الجبل بشوّيا، كنت من اوّل النّاس هابط و مخلّي ورايا قلب حزين علي فراق امّي و غصّة كبيرة بعد متخرجت ملقيتش حل كان الهروب من بلادي، وصلت قدام الشقّف قالي يلاّ اطلع و قدم القدّام، طلعت و بدات الناس طالعة كنّا 22 واحد كل حد و قصتو و كل حدّ و احلامو شقف صغير 6 متر و موتور Yamaha 40 و 8 بادن ايسونس بو 20 لتر مع ستايك ماء و شويا ڨوفرات و شوكوطوم لا حد يطيحلو السّكر. لا جلي سوفتاج و لا شيء، كنت لابس شورط و خلعة كحلة و شلاكة adidas قصيتلها جنبها بسكينة و لفيت 150 أورو في شكارة بلاستيك متع فارينة و غلفتهم بسكوتش و حطيتهم في التّقطيعة متع الشلاكة قلت حتّى كان شدنا الحاكم متع تونس بالك ميفقوش بيهم....بعد مركب آخر واحد، الرايس نزل علي المطور طشني الماء بحكم كنت راكب من قدّام بالكل قلت ياربي لعمال عليك اول موجة تبليت و ماء دخل للشقف ... متفاهمين حدّ ميشعل حتي سڨارو لا يرانا الحاكم، كّل منقدمو نقول ربي يسهل و ذكر ربي في قلبي و تصورة امي المسكينة فبالها بايت ساهر في رفراف كيف العاده.....طفل صاحبي قالي ياسين كان نغرقو هنا انا و أنتي نجمو نخرجو بحكم عمنا مع بعضنا قبل زاد شويا قالي ياسين كان نغرقو لنا حتي حد فينا مينجم يخرج قتلو بربي ابعدني من التوسويس توة صار لصار......بعد 5 سوايع قال الرايس توة تهنينا من حاكم تونس فرحنا و ليتكيف شّعل الدخّان و ناس جبدت تلفونتها تعمل في فديوهات و فارحين.....في وسط البحر ترا كان سماء و ماء منضر واعر و يهز القلب برغم ولد بحر اما العمق هذا اول مرة نوصلو تعدا علينا نهار سخون برشا في البحر نحس بالتعّب، تضربتي موجة تفيّقني كل ما ينزل علي الموطور الشقف يتهز و يتنفض نحّسو باش يتقسم علي أثنين و طاح علينا الليلّ و مازلنا موصلناش... معندناش ضوء كان القمرة بحكم أحنا متفاهمين نهبطو في مدزارا Mazara Del Vallo جنوب اطاليا Sicilia باش ما نتشدّوش من حاكم اطاليا و الرّحلة هاذي طويلة

Posté par Hamza_42366 le 2023-09-08