Ghada_85283 sur Sekritoo — Questions ❓

Questions ❓

..........منقول........
أنا ماننكرش الجانب الخايب فيّا، ما ننكرش إنو ننسى فيسع، واني ياسر أناني ونحبْ روحي برشا على حساب مشاعر العباد، ماننكرش قداش في لحظة انجم نطيش مسؤولياتي الكل على جنب، ونبقا نخزرها بعين رات وعين ماراتش، ومايهمنيش قداش النار الي فيّا تنجم تحرق وتقتل ساعاتْ، نعرف إلي أنا إنسان خايب برشا وقراراتي شادة في شعرة، نعرف الي نقول كلام وننسى الي قلتو، ونعرف قداش من مرة قلت بش نرجع ومارجعتش، نعرف روحي كيف نتغشش انجم نوجع ونجرح، ماننكرش الي وجعت برشا ناس، خاطري كلام مؤلم هذاكا علاش ديما ساكت و نعرف قداش طيشتْ ناس ورايا كان ماشي فيبالي وجودهم متع العمر كلو ياخي طلعو متاع لحظة و لحظتين ، نعرف الي البخل عاميلي عيني، والي نُرقد أكثر من الي نتحرك، أما نتحرك بزايدْ حتى لينْ ساعات نحس النفس تقطعلي، نعرف الي مانسألش ومايهمنيش شكون سأل وشكون ماسألش، نعرف الي ساعات تركبلي ونولي مانتعدالكش حتى بطرف ماء، ونعرف قداش طبيعتي تظهر كاسحة ساعاتْ ، نعرف الي ثما عباد مانجمتش نوفيهم حقهم، وماننكرش الي ساعات نولي بارد ، نعدي في الدنيا بالكيف، نعرف الي مانرحمش ومانعديش الغلطة بالساهل، ونعرف الي نتفكر حاجات كيما نتفكر تفاصيل وجهي بالضبط تفاصيل مازلت مكبشة في راسي يا ريت انجم ننساهم ومانتصورش كان نهار ننساهم، نعرف قداش جريتو على مصلحتكم، وقداش من مرة نلعبها الملك متاع الدراما وماننكرش إلى منيش ديما هنا وساعات نتخبى وماتلقانيش، نعرف قداش من لون عندي، ونعرف وقتاش نتلون، ووقتاش نظهر بالأبيض، ووقتاش نولي ظلام دحيس الدنيا الكل تسطع في حيوطي اما يبقى قلبي اصفى من وجوهكم ... نعرف اي نعرف و ديما نعرف

Posté par Ghada_85283 le 2021-08-03