Sami_85681 sur Sekritoo — Questions ❓

Questions ❓

السلام عليكم الناس الكل حبيت نحكي حكايتي هنا بالكشي نلقا شكون ياقف معايا و الا يعاوني في حلان المشكلة هنا و نعرف الي برشا باش يجيو ضدي اما لازم نجرب الحلول الكل خاطر ماعادش فيا
انا عمري 22 سنة نسكن في منوبة حالتي النفسية تاعبة عاللخر شدة الألم النفسي الي نعاني فيها كل يوم لا تحتمل !! علاه ؟
خاطرني وحدي حرفيا ديما قاعد وحدي فالحومة في اي بلاصة ماعندي مع شكون نخرج و الا نبقا من دون خلق ربي الكل كان انا لا صاحب انتيم لا مجموعة و الا ولاد حومة نبقا معاهم الكل اصحاب مصلحة ...
نبدا نتحرق مالداخل و نتشوا كي نبدا نشوف في خلق ربي الي هذا عندو صحابو ديما معاه كان انا وحدي
تعبت مالوحدة ماعادش نجم نتحمل الألم النفسي الي صاير فيا كل يوم من جرة الوحدة و العوج
صحاب الصغر و اولاد الحومة ماعادش معبريني ولاو اصحاب مصلحة و الي قراو معايا قبل توا ولاو عبارة ما يعرفونيش ...
بحكم اني ما عشتش طفولة كاملة تحت عمر 12 سنة و كل مرة نكريو من دار لدار كنت محصور فالدار عايلتي ما يخلونيش نخرج البرا و كانو صعاب معايا..
نبدا كان نستنا في اقاربي مالعطلة للعطلة باش يجيو بحذانا و نفرح عاللخر باش نتلمو مع بعضنا اكهو ما كنتش نعرف حاجة اسمها شارع و الا ولاد الحومة و الا صحاب صغرة ما جاتنيش الفرصة اني نعيش طفولة كيما الصغار الكل
وليت نخرج مالدار في عمر 13 سنة بعد ما ستقرينا في دارنا عديت كان عامين صغر من 2012 حتى 2014 مع ولاد الحومة عرفني عليهم ولد خالي الي كنا صحاب عاللخر و كنا ديما مع بعضنا في كل شيء عديت معاهم احسن ايامات ما توقعتش منهم انهم باش يجي نهار و يتبدلو يخلوني وحدي خاطر بعد جات فترة في اخر 2014 ولاو فساد و مجرمة ما حبيتش نكمل نتبعهم خاطر ما حبيتش نتبع الفساد كيفهم وما نتفاهمش معاهم بالعقلية هاذي حتى ولد خالي الي كان صاحبي الأنتيم طفاني و بحكم البلاصة الي نسكن فيها الكلها كلوشارات تكون عاقل تولي محقور و بيك و عليك و موش بالساهل باش تعمل فيها صحاب جدد خاطر العقلية متاعهم خايبة عللخر لازم تولي فاسد باش يحترموك !
من فترة 2015 و انا وليت وحدي بعد ما مشاو صحاب الصغرة واحد واحد و ما عندي حد بقا معايا حبيت ننتحر و ما نجحتش و بعد حبيت نعمل اصحاب جدد مالحومة بحكم اني ما نبعدش مالحومة نتعرف عليهم بالفيسبوك و بعد نولو ننقابلو و نولي عندي صحاب اخرين و ماعادش نبقى وحدي
الفكرة نجحت نوع ما اما موش كيما حبيت

Posté par Sami_85681 le 2021-08-24