Mehdi_53050 sur Sekritoo — Questions ❓

Questions ❓

عسلامة الناس الكل
ليوم حبيت نشارك معاكم سري و في نفس الوقت يعتبر مشكل سببلي حزن و غمة في قلبي و ضيق في صدري و خلاني نراجع روحي لعل مقصر معاها في حاجة .
المهم ندخل في صلب الموضوع ، عندي عامين عرس ما حسيتش فيهم بالسعادة الحقيقية بالرغم خذينا بعضنا عن حب و نعرفوا بعضنا سنين نعرفوا تصرفات بعضنا و طبيعة بعضنا تقريبا كل شي نعرفوه على بعضنا برشا تفاصيل ، عرسنا عن حب و تفاهم و توفرت كل مقومات نجاح العلاقة الزوجية و قبل العرس متفاهمين على أبسط التفاصيل و من بينها نعيشوا حياتنا منغير صغار نعيشوا لرواحنا ماكم تعرفوا الصغار حاجة باهية و خايبة في نفس الوقت.
المهم ، المشاكل بدات وقت صاحباتها ركبولها فكرة الصغار في مخها و قالولها راك بديت تكبر فالعمر و كل ما تكبر كل ما تنقص فرص الإنجاب ، لمرا تقلبت و تبدلت و ولات معاش تحب ترقد معايا و بدات تحتج قتلي إنت تحب تمارس العلاقة كل ليلة ماكش شابع تحب في الصباح و فالليل و قتلي تعبتني معاش نجم نواصل هكا. كلامها جرحني موش على خاطر تتشكى مني ومن شهوتي الكبيرة أما خاطر عمري ما حسيت إنها تاعبة في جرتي ولا فرضت عليها العلاقة بالسيف و كانت ديما فرحانة و متحمسة باش نرقدوا مع بعضنا و كانت تلبس أحسن لبسة عندها . فهمت وقتها إنها فدت مني و صعيب نجم نكمل معاها بعد اللي قالتو في كامل وعيها وليت طلبت الطلاق و قلتلها قرار معاش نتراجع فيه و ربي يسمعنا على بعضنا الخير و نطلقوا بالتراضي، جاوا عايلتها بعد ما حكاتلهم الحقيقة و قالتلهم راني غلطت معاه و وجعتو و ما تحبش تطلق و طلبت السماح ، و رغم هذا مازالت مكبش فالطلاق خاطر عندي عزة نفس و كرامة و مستحيل نقبل بحتى إهانة في حقي و في ذاتي و قراري خذيتو صايي و باش نفذو و ان شاء الله ما يكونش قرار غالط .
كان جيتوا في بلاصتي تعملوا كيفي ولا عندكم تفكير أخر ؟

Posté par Mehdi_53050 le 2021-09-16