Ghassen_7570 sur Sekritoo — Confessions 🤫

Confessions 🤫

عسلامة ناس الكل
خسرت صحابي لكل او بالاحرى تخليت علاهم
اصدقاء الطفولة و اصدقاء لقراية و حتى العمل
الاسباب الي خلتني نتخلى هيا نظرتي ليهم الي انا نراهم خماج و فسّاد ..مثال يقعدو في القهوة يحكو كان على بنت فلان و بنت فولان و اذيكا بدنها و اذيكا درا شنيا ... أو المخدرات برامج الشرب الاسبوعية كأنو يوم السبت صار مقدس
حاولت نجاري المواضيع و حاولت اكثر من مرة نتأقلم لكن شي .. وليت نلقى روحي قاعد نتعب مالدائرة هاكي ...
2017 اخترت ثنية جديدة قلت هاذي فيها الخلاص الفكري و المعنوي و باش تساعدني نتجاوز صحابي الخايبين و موت بابا .. طلعت نخيّم و فعلاً تفرهدت و مشات كل آثار التعب النفسي الي كانت عندي
بعدها سافرت نخدم و روحت عرست و جبت صغار صارو هما عالمي و العيشة و النفس الي نتنفسو
لكن بلاصة الصديق فارغة و بلحق مهما كان لازمك صديق ياقف معاك يواسيك يعطيك حل فكرة اختيار
مخيبها الدنيا متعطيش كل شي
كيف نتفكرهم قلبي يوجعني و موش نادم الي تخليت علاهم
لكن لبلاصة فارغة و نتمنى نقابل ناس تستحق الصداقة و تقدّر قيمة الصديق .

Posté par Ghassen_7570 le 2024-06-26