Mariem_72463 sur Sekritoo — Questions ❓

Questions ❓

حبيت نحكي حكايتي وفي نفس الوقت نقدم نصيحة لوجه الله .
قبل كنت طفلة عادية مانخالط عباد ماندخل في نقاشات بادي باد قرايتي
والحمد لله كنت من الطلبة الأوائل وقتي كامل لعائلتي وقرايتي وتطوير نفسي .
في عمر 19 سنة جاتني فرصة فحبيت نجرب الحب كيفي كيف أي طفلة فعمري
تعرفت على واحد حبيتو حب يتمناه أي إنسان دامت علاقتنا فترة كنت صابرة على حكاية الخطوبة بحكم أنو مزال يقرا ،
بعدها كتب ربي وتفارقنا وقتها
أنا انهرت كنت متعلقة بيه لدرجة كبيرة عمري ولا هزيت عيني مع راجل غيرو
بكيت عيطت خسرت صحتي وقريب لعاودت العام تدمرت صح صح
خاصة لما عرفت أنو رجع للي كان معاها قبل حسيت اديكا الفترة كل كانت وهم .
حبيت نوصل رسالة لكل واحد عمرك ولا تتعلق
الوحيد لي تتعلق بيه هو ربي قلبك خلقو ربي ليه وحدو ” ماكان لإمرئ من قلبين في جوفه ” ،
حب نفسك صدقني كون متكونش تحب روحك ماكش راح تلقى الحب من الناس كيفاه يحبك ونتا متحبش روحك ؟
كيفاه يقدرك ويحس بقيمتك ونتا مش حاس بقيمة روحك ؟
أي حاجة تسحقها من الناس عندك لداخل الاهتمام مدو لروحك ماتستناه من حتى واحد
الحب اديه من المصدر الحقيقي للحب لي هو ربي
ماتتشحتو من حتى واحد في علاقاتك مع صحابك ومع الناس ككل وازن متكونش ديما الطرف لي يحب أكثر ،
يقدم أكثر ويتنازل أكثر كل حاجة فاها التوازن تجي ملاحة وتستمر .
عمر وقتك بحوايج تفيدك حتان تولي متلقاش الوقت باش تخمم في الحب وأدي الحكايات طيش
تجيك الحاجة سيدنا يعقوب دا سنين وهو يبكي نهار حبس رجعلو سيدنا يوسف تخلى واستغني وربي يعوضك خليه هو سبحانو يخايرلك الانسان لي يساعدك .
في الأخير نقولك سامح وصفي قلبك أي إنسان آذاك يجي نهار وتقولو ” شكرا ” كي تعرف بلي ربي بعثهولك يعلمك درس..
كنتي راح تولي بالقوة أدي كون مادارلكش الهدة ؟؟
كنتي راح تولي تعرف كيفاه تقدم مشاعرك كون مجرحوكش الحمد لله وين كان العبد ووين ولا سمحولي على الإطالة ، في أمان الله

Posté par Mariem_72463 le 2021-11-23