Emna_7216 sur Sekritoo — Questions ❓

Questions ❓

صباح الخير جميعا، بربي الشخص اللي يكون يخدم وحياته مستقرة عمليا ولكن إذا تعرض لاضطراب في علاقته خاصة بالطرف المقابل سواء زوج او خطيب. تتفرعس اموري كلها ونولي ماعادش نجم نخدم و ماعنديش حتى رغبة لا باش نخدم ولا باش نترانا ولا باش نواضب في ماكلتي. نفقد حقيقة طعم الحياة. ننعزل ونكتئب ونولي فاقدة رغبة الحياة جملا. شنية نعمل. انا أي إشكال او اضطراب نتعرضلو مع زوجي نفقد الرغبة في العمل والحياة ككل. نحس بوحدة كبيرة ونحس الدنيا كلها ماعندهاش قيمة عندي. بالرغم اللي انا انسانة ياسر ياسر عملية ونخدم ونحب برشا خدمتي ونقدس الزواج والعمل. أما زوجي ربي يحفظه ساعات تصرفاته تنرفزني كي يكون مش مهتم بالقدر الكافي او يكون مش لاهي بيا. الحاجات هذه انا تأثر فيا لاني نؤمن برشا اللي بالكلمة الطيبة احنا عايشين بيهم الحاجات هاذم. كلام باهي ساعات ينسيك في تعب النهار.
فما نقطة أخرى، نحكي من منطلق شخصي، علاش المرأة مهما كانت خدمتها باهية وأحيانا خير حتى من الرجل ولكن ديما تحس روحها ماتنجمش تعتمد على روحها وحدها واللي وجودها يكتمل بوجود رجل في حياتها. انا عمليا وضعيتي افضل من زوجي ربي يفضله ولكن كي يصير اي إشكال كيما اللي حكيتو بالرغم اني مش غالطة لكن ديما نحس روحي مانجمش نعيش وحدي و مانجمش نعين خيط في ابرة الا ما نشاور وناخذ رأيه في كل كبيرة وصغيرة لانه العقل الباطني متاعي يقولي انه هو رأيه ديما باش يكون أصح من رأيي. علاش المرأة ماتنجمش تحس بروحها انها كاملة إلا بالرجل.

Posté par Emna_7216 le 2022-03-09