Eya_70697 sur Sekritoo — Questions ❓

Questions ❓

لازم تفهمو كلمة " أنا تعبت "
كي تسمع انسان ديما يقلك ( راني تعبت ) و الا ( راني تاعب ) ماهوش يقصد الي هو ناقص نوم و الا تاعب في بدنو و الا يحب يرقد 😞
#تعبت معنتها معادش عندي طاقة باش نحمل ..معادش عندي طاقة باش نعارك و ناقش و نفسر و نلوم. و نحكي .. معادش عندي طاقة حتى بش نلز روحي باش نتبسم
#تعبت معنتها معادش نجم نقبل طاقة سلبية معنتها راني في أضعف حالاتي و ممكن كلمة شبي وجهك أصفر تخليك تبكي يومين و ماكش فاهم علاش و الا شنوة سبب الي يبكي فيك !!
#تعبت معنتها البارح نجم ندهم على جبل بقادومة.. اليوم معنديش الطاقة حتى باش نفيق و نقابل الناس
#تعبت معنتها ما تقوليش برة ارقد ارتاح !! راحتي موش فالنوم راحتي كي نلقى شكون يعطيني طاقة ايجابية..راحتي في ميساج منغير سبب ، في إهتمام زايد ، في كلمة طيبة ، في دعوة مالقلب ❤
#تعبت معنتها هاك الصوت الي داخلك الي يقلك فيق و عمل على ربي و الحياة حلوة و إضحك و العب و اخرج و تفرهد و طيب و كول و اشرب و حل تلفزة تفرج على حاجة و اشري و connecté و احكي مع صحابك و احكي مع الي يحبوك.... اليوم يقلك سكر التلفون و سكر على روحك البيت و ابعد عالناس الكل و مصاب راك جيت في جزيرة مطيش وحدك ما ترى حد و ما يقلقك حد شبيك و ما فماش حاجة ملزوم عليك تعملها و سكر عينك ماعادش تحلها..
#تعبت معنتها فما 1000 حكاية و حكاية في مخي و ألف احساس و احساس و ألف فكرة و ألف صوت و ألف تنهيدة و حرب و قنابل و موت و صراعات في داخلي و كي تسألني نتخنق و نقلك #ما_فما_شيء و الا #لا_لباس 🙂
• الي تاعب ماهوش يستنى منكم باش تقولو على ربي و الا تي هانا الكل كيف كيف.. الي تاعب ماهوش يستنى باش تقولو برة ارقد.. الي تاعب ماهوش يستنى في كلمة الله غالب و هاكي دنيا .. و الي تاعب خاصة ماهوش يستنى في كلمة شبيك منكد و شبيك ديما فاد منغير سبب ..خاطر هو ما وصل للحالة هاكي كان راهو تعب و ما لقاش القوة باش يرجع كيما قبل

Posté par Eya_70697 le 2022-08-15