Zied_16956 sur Sekritoo — Questions ❓

Questions ❓

كى ما تعرفش اصغر détail في الانسانة لى تحبها تتسمى ماحبيتهاش.. كى ماتعرفش شنو تحب تلبس وشنو اكثر موزيكا تحبها.. كى ماتعرفش شنو تحب وشنو تكره.. كى ماتعرفش شنية مخاوافها وشنوما الحاجات لى يقلقوها وشنو الحاجات لى يفرحوها..كى يتعدى العام معاها والعامين كانو درج..كى ما تحلاش الماكلة والخرجة و الضحكة و كل شيء فى غيابها.. كى تبقى نفس الشخص قبل ما تعرفها وتقعد نفس الشخص بعد ما عرفتها ما تتسماش حبيتها.. كى ما يتبدل فيك شيء و ما تغيرش افكارك على خاطرها ما تتسماش حبيتها.. كى ما تعلمك شيء..كى ذوقك ما يتحسنش..كى تفكيرك ما يتبدلش..كى ماتهبلش على خاطرها..كى ماترجعش طفل صغير وترتاح كان كى تكون معاها وماتحسش انو الفرحة باش تخرج من عينيك ما تتسماش حبيت.. كى ما تغزرلهاش على انها حاجة مش عادية موجودة فى حياتك وانك مكش مصدق انو انسان مزيان لها الدرجة وصل حبك انتى.. كى ما ماتغيرش علاها.. كى يولى وجودها كى غيابها.. كى معش تخدم مخك و تلعب لعبة السقوطية معاها.. ماتتسماش حبيت.. كى ما تخممش للحظة انك باش تبدل حياتك وباش تكمل معاها حياتك..كى ماتخممش انك تكتفها وتخليها بازيد درج معاك.. كى ما توصلش تخمم انك تحب تجيب منها برشاا صغار..كى معش تخمم بالمنطق وبالعقل وتولى مهبول وتبعد ع الناس على خاطرها تتسمى ماحبيتش.. كى ماتعرفش تضحكها فيسع..كى ماتعرفش ترضيها..كى ماتعرش نقاط ضعفها .
كى ما تراها كان هيا فى الدنيا.. كى تنجم تبقى نهار ما تسمعش صوتها..كى تنجم تبقى بعيد علاها جمعة ما تتسماش حبيتها.. كى تنجم تتصرف وتاخو موقف مغير ماتسمع رايها.. كى تنجم تختار بين زوز حاجات مغير ما تقلك هذه خير..تتسمى ماحبيتهاش.. يمكن تتسمى صوحبتها.. جيست عرفتها وكنتو مع بعضكم سنوات.. تنجم تعرس باها تنجم تجيب منها صغير و ثنين و 3.. اما مستحيل تقول رانى حبيتها..المحبة انك تحبها اكثر من روحك.. انك تعرفها اكثر ملى تعرف روحك.. انك تخبيها عندك..انك تقعد معاها فى الحلو والمر.. ..انك تخاف عليها اكثر من روحك..انك تراها حاجة كان خسرتها معش باش تتعاود مرة اخرى
خاتر الحاجات المزيانين مايتعاودش مرتين..الحكاية مش مربوطة لا بعمر مناسب لا بوضع مادى مناسب لا بضروف مناسبة..الحكاية مربوطة بوجود شخص مناسب فى حياتك..ومع ها الشخص تاو كل شيء يجى بطبيعتو وحتى كان ماجا شيء..تى ها العبد هو كل شيء ومعاه معش تستحق شيء ❤️

Posté par Zied_16956 le 2022-09-09