Akram_40082 sur Sekritoo — Questions ❓

Questions ❓

فما ناس حساسين برشا وقت تحكي معاهم بغش تبكيهم ويدخلوا بعضهم، اقل كلمة حتى بالتفدليك توجعهم . العباد هذوكم تلقاهم عندهم طاقة حب كبيرة برشا يحبوا الكائنات الكل وعادي جدا يبكوا على قطوس مات ولا على نبتة ذبلت ويبست. العباد هذوكم مايخبوا شي على خاطر في وقت الوجيعة دمعتهم تسبقهم وفي الفرحة عينيهم يلمعوا وعينيهم ديما فاضحتهم...العباد هذوكم يتوجعوا اكثر منك على حكاياتك تخصك وماتخصهمش .
الناس هاذم موجودين في كل بلاصة،في العائلة والقراية والخدمة،في الأصدقاء وفي أي بلاصة تمشيلها... تنجم تفرحهم بجاست بسيطة برشا على خاطرهم يكرهوا التكلف والتصنع بسطاء برشا في مشاعرهم وفي حياتهم . العباد هذوكم يتقلبوا فيسع ويرجعوا فيسع كيف موجة البحر، ودوب ماتطلب منهم السماح يسامحوا وينسوا تقول عمرهم ماتضروا ولا خذوا في خاطرهم عليك...
كان عندكم منهم في حياتكم ردوا بالكم عليهم واكهو على خاطر كان خسرتوهم معادش باش تلقوهم ...❤️❤️
العباد هذوكم نحب نقولكم محلاكم وربي يفرح قلوبكم 🤗🥰

Posté par Akram_40082 le 2023-02-04